ما حدث في 28-11

يوم 28-11 نزلت أنا و و الدي و والدتي إلي اللجنه الإنتخابيه اللي أطلق عليه التلفزيون المصري العرس الديموقراطي.

و اللي قارفنا بيه الإخوان و إن إنتخابات مجلس الشعب هي اللي هتخلصنا من المجلس العسكري و من قرفه مع إن اللي أعرفه إن مجلس الشعب سلطه تشريعيه و ليست سلطه تنفيذيه و تعودنا في مصر إن السلطه التنفيذيه بتنفض للسلطه التشريعيه و القضائيه و أي حاجه تحبها ، و لكن حجه البليد.

أول ما وصلت اللجنه لقيت قدامها شباب قاعدين يوزعوا كروت لحزب الحريه و العداله بره اللجنه و يملوا الناس يختاروا إيه ، فلما قربت منهم كان والدتي و والدتي قدامي فأخدوا الكروت عادي ، أنا قلت للشباب إن الوقوف هنا غير قانوني و إنتوا المفروض توضعوا تحت المسائله القانونيه

ردوا عليا : ليه؟؟؟؟؟؟
قلت : لأن المفروض إن الحملات الإنتخابيه وقفت من إمبارح خلاص و ممنوع حملات إنتخابيه دلوقتي

فجأه لقيت والدي إلتفت و قالي في لهجه مستهجنه : و أنت مالك؟؟؟؟؟

بصيت لوالدي في ذهول و قلت : إزاي ما يبقاش مالي دا غلط و أنا ما أسكتش علي الغلط ، المهم خدت النصيب من التهزيق من أبويا و دخلت اللجنه كانت الدور التاني أول ما طلعنا فوق لقينا ست منقبه و بتسألنا أنتوا لجنه كام ؟؟؟؟؟
قلنا رقم اللجنه ، فردت مشيره بإتجاه اللجنه و هي بتدينا كروت ترشيح مرشحي الحريه و العداله
هنا قمت قايل : و طب و دي بتهبب إيه جوا هنا ؟؟؟؟؟؟؟؟؟؟ و كالعاده والدي رد علي و أنت مالك ؟؟؟؟ وخدت برضه اللي في القسمه و قالي مش عايز و لا كلمه
بعدها دخلنا اللجنه بالترتيب و إنتخبنا

و بعدين رحت شغلي الخاص

طبعا في الطريق لشغلي أسمع كلام غريب الست اللي بتقول من لم يختار حزب النور لا أبقي الله النور في عينه ؟؟؟
لم أرد أن أرد عليها لأني كنت هشتم بجد كيف و قد حرمت هذه المرأه من نور البصيره أن تدركت ما تقول و لكن واحده  واضح إنها قريبتها ردت و قالت طب و الله ما أنا واخده حزب النور و هختار الإخوان

طبعا أنا شايفها إنها إنتخابات هزليه في الغالب العام و المجلس العسكري هيطلع و يقول بعدها الإنتخابات وضحت أد إيه الناس واثقين فينا و بيحبونا و عايزنا في الحكم


خلص اليوم الملئ بالاحداث الهزليه و ذكرت أبرز ما فيه

محمد غلاب

شويه تهييس

بما إن أنا أول مره اهييس في الكتابه و الواحد عايز يطلع بره مود الثوره شويه لأن الواحد بيتعصب جامد قوي

فأحب أنوه إن أنا ههيس

طلعت لشويه الفراخ اللي أنا بربيها و اللي بجرب فيها كل حاجه درستها (واحد فاضي بقي)
نوع مهجن أسمه ساسو المهم الفراخ لسه صغيره بس عنيفه و بتعض و بتخربش بغباء مهتمتش بس في الاخر حته فرخه مفعوصه نطت و كانت هتجيب النضاره من علي وشي و هنا شرد فكري ..............................طب هما عملوا فيلم Rise of the Planet of the Apes  طب ما يعملوش ليه فيلم Rise of the Planet of the Chickens و يتخيلوا كدا غن الناس بتتهاجم من الفراخ و إن الفراخ يحرمنا من بيضه (أه يا بيض) و تنضم لحركته الثورمه الديوك الرومي و البط و الوز و بالمره السمان و الحمام و الطيور المهاجره
لا و بعد كدا يستعبدوا البشر و تبتدي حرب الفراخ و تنتصر الفراخ لأنها بالنقر و العض هتدمر اسلحه البشر الضعيفه و يقاد البشر في سلاسل كالبهائم و يخدم البشر أسيادها الجدد الفراخ، و لكن لطمع الفراخ في الحكم يثور عليهم الديوك الرومي و يسقط حكم الفراخ و من ثم النزاعات علي السلطه إلا أن يضعف جنس الطيور فيحكم البشر مره اخري و في نهايه الفيلم يوزعوا علي الناس وجبات كنتاكي و 400 جنيه أو دولار علي حسب الدوله و معاها منشورات بكيفيه القيام بالثوره .

لا مش نافع كدا أنا شكلي بهيس فعلا ، يا جدعان حد يجبلي قنبله غاز أفوق عليها و لا رصاصه مطاطي

خلاص شكلي هضيها خل لغايه أما أشوف قنبله

كنتم مع البلطجي اللي كان قبلها عميل و قبلها أجنده و أي حاجه أنت عايزها

سياسه التكفير و أثرها في حاضر و تاريخ المسلمين

في هذه الفتره التي تعقب الثورات تستشري فيها غتهامات التخوين و العماله لكل فرد يطالب برأيه أو نظره مختلفه للأمور، و عند دخول الجماعات الدينيه التي عانت الأمرين علي يد النظام السابق إلي معترك السياسه ظهرت إتهامات أخري في الساحه التي تصل إلي التكفير.

و لكن الأخوه و الأخوات يعلموا ما يحمله التاريخ من إتباع سياسه التكفير و ما في جعبته من كوارث.

دعونا نذكر حقيقه أولا، أنه لا يسقط الدول الإسلاميه إلا دول إسلاميه أخري و من ثم تأتي الدول الغربيه و تأخذ ثمار تدمير الدول الإسلاميه ببعضها البعض.

فمن ذا الذي أسقط العراق؟؟؟؟ ، طبعا ليست الولايات المتحد الأمريكيه الذي دعم صدام بالسلاح و المال داعيا إياه لغزو إيران الدوله الغسلانيه و التي كانت علي المذهب الشيعي اكثر من ألف عام فمن ثم ليس من المفاجئ أن تقوم الحرب جزافا خوفا من الدوله الشيعيه التي لم تكن وليده اللحظه، و عندما خرج من الحرب مديونا ، دولته تتعثر في كل المجالات تبيعه كل الدول العربيه و الإسلاميه فتثبت طموحاته العسكريه علي التوسع علي حساب الكويت و من يدري ما كانت مخططاته.

أو ليست المملكه العربيه السعوديه هي من دعمته بالمال و السلاح و أيضا مصر في عهد المخلوع بالسلاح ضد إيران، و من دعي قوات التحالف علي أراضيه لصد قوات صدام في حين أن قوات الدول الإسلاميه أو العربيه تستطيع رده أو ليست السعوديه أيضا.

و من أين بدأ الغزو الامريكي للعراق أوليست من قاعده العديد بالعراق و قواعدها في الكويت؟؟؟

أنا لا أعطي دروسا في التاريخ وة لكننا نأخذ الدروس و العبر من التاريخ.

من الذي دمر دوله المماليك الإسلاميه أوليست الدوله العثمانيه، و بالتكفير أيضا التي أطلقها سليم الاول علي الدوله الصفويه الشيعيه في إيران دخلت الدوله العثمانيه معها في حرب ضروس و تخلت عن دورها في الفتوحات الإسلاميه في أوروبا.

و نفس ما فعله تيمور لنك و كاد أن يدمر الدوله العثمانيه الوليده في عصره.

و نفس ما فعلته دوله الموحدين مع دوله المرابطين، و كفي مثلا بأنهم عندما إقتحموا مراكش عاصمه دوله المرابطين أبادوا و قتلوا كل من فيها و سبوا نساء المرابطين المسلمين مثلهم و أصبحت دوله الإسلام من ذلك الوقت في عد تنازلي مع السقوط.

هذا ما فعلته سياسه التكفير في التاريخ الإسلامي، فلماذا نلجأ لهذه السياسه طالما أنني علي حجه قويه و طالما أنني علي الحق؟

كما أحب أن أنوه الأخوه المستخدمين لشعارات و إتهامات التكفير إنها ذو سلاح ذو حدين، سيحرق عدوكم و من ثم تحرقكم .

ألتمس من سيادتكم التعقل و التحدث بعقلانيه فليس كل ما لا تفهموه هو كفر، و قد نشر الجهل السياسي و الثقافي و من ثم الديني في مصر، فلنبدأ الان البحث و ليس إتباع ما نسمع و السير وراء شعارات جوفاء لا هي تقدم و لا تدفع الأمه بل تحقق فقط شعور داخلي كاذب بأنك فعلت ما أمر به الله، و ما أنزل الله به من سلطان.

محمد غلاب

17/9/2011