حرب أكتوبر

أنا كاتب الموضوع دا النهارده علشان أنا سمعت كلام كتير من ناس حوالينا بيقولوا إن دا نصر أي كلام

أو إن مصر كسبت أول الحرب و بعدين خسرت في النهايه

أو اللي بينفض

أو كما نجحت إسرائيل بإعلامها بإقناع العالم كله تقريبا إن هيا اللي إنتصرت في الحرب

الكلام دا كله مش صح

الحرب دي كانت أسطوره

لأن قبل الحرب الصهاينه أو السي أي إيه ما كانوش متخيلين إن هتبقي في حرب مش لعبه مخابرات بس ، لأن تسليح الجيش المصري أضعف من إنه يقوم بحرب

طب وحده وحده ، بص يا سيدي:

مثلا سلاح الجو:

بعد 67 السلاح الجوي معظمه إنتهي و هو علي الأرض

إستوردنا من الإتحاد السوفيتي الطيارات اللي كان بيجبهالنا درجه تالته قطع غيارها قليله و فاسده و غيره و غيره............

أما إسرائيل الطيارات كانت بتصنع لها في أمريكا بشكل خاص الفانتوم

اللي كانت الطياره الرئيسيه في الجيش الإسرائيلي في 73 و دي كانت عامله وقتها زي الإف-22 ربتاتور دلوقتي و كانت تقدر تشيل 6 صواريخ جو جو بحالهم أو 2.5 طن أسلحه.

و الطيارات التانيه السكاي هوك و الميراج الفرنسيه.

و مدي الطيارت دي كانت تقدر تلف مصر كلها لغايه الصعيد و ترجع لقواعدها في إسرائيل.

أما مدي الصواريخ الجو جو 5 كم، طبعا دي كانت فانتزيا في الوقت دا .

أما الطائرات المصريه كانت الطائره الرئيسيه الميج 21 قدراتها إيه

حموله لا تكاد تصل 750كجم أيوه والله

أما المدي 450 كم يعني لو في قتال فوق المطار الطياره مش هتستحمل و هتقع علي طول فوق المطار اللي لسه طايره منه

الصواريخ الجو جو تكاد لا تصل 3.5 كم (يعني من المفترض إن الطيارات الإسرائيليه تصطاد الطيارات المصريه قبل ما نوصل لها ب1.5 كم)

من هذا نستنتج أن سلاح الجوي المصري فعل المستحيل (إقرأ فقط عن معركه المنصوره الجويه و ستفهم الباقي)

أما السلاح البري:

فتم تدمير أكثر من 85% منه في النكسه

فتخلت القوات المسلحه من أن تشتري مدرعات أو مركبات نقل للمشاه نظرا لضعف الميزانيه

يعني المشاه المصريين كان قصادهم المشاه الإسرائيليه الراكبه و اللي في مدرعاتهم و بيضربوا من جواها أو بتوفر عليهم مشقه السير في صحراء سيناء القاحله.

طب بالنسبه للدبابات فمعظم الدبابات كانت قديمه من نوع تي-34 اللي من أيام الحرب العالميه الثانيه و دبابات تانيه من طراز تي-54 وتي-55 و تي -62 و كان أفضلهم التي 62 اللي كانت جايه قبل الحرب علي طول و كان عددهم 200 دباباه مش الرقم المهول يعني.

أما مدي قذائف الدبابات فكانت الدبابات الإسرائيليه متفوقه لأن دباباتها ذات مسوره 125 مم أما دباباتنا كان بها ما هو 80 مم و كان أكبر حاجه 120مم.

ده غير قواتنا البريه مفيش مسانده ليها جويه طب و بعدين يبقي الدبابات تبقي محميه من الطيران الإسرائيلي عن طريق حائط الصواريخ يعني ما تبعدشي عن الجبهه أكتر من 12 كم مدي صواريخ الدفاع الجوي.

طب إسرائيل كان عندها حوالي 1500 دباباه قبل الحرب علي الجبهه المصريه تم تدمير أكثر من1000 دبابه منهم (إذا تخيل مدي حجم المساعده الأمريكيه لها في وقت الحرب)

أما بالنسبه للسلاح البحري:

فإن مصر أقوي من إسرائيل بمراحل فيه لكن المشكله مفيش دعم جوي برضه أو حمايه من الطيران الإسرائيلي فأدي لتقليل من دوره و لكنه أقفل مضيق باب المندب و فرض حصار شبه كامل علي السواحل الإسرائيليه و دمر الأهداف الساحليه اللي علي سيناء للعدو الصهيوني.

و مننساش برضه إغراق المدمره إيلات و بالصواريخ البحريه و ده كان أول إستخدام ليها في التاريخ و اللي عمل ضجه رهيبه و نزول صيحه جديده في عالم التسليح بعد أن أغرقت زوارق بحريه مدمره كامله دون أن تتعرض لخدش.

أما الدفاع الجوي:

فهو ده اللي يستحق التحيه و التصفيق طويلا فتم بناء الحائط تحت أسوأ ظروف فقبل أن يجف الأسمنت الموضوع لقواعد الصواريخ تكون الطائرات الإسرائيليه ضربته.

إذا بناء حائط الصواريخ في حد ذاته إعجاز عسكري رهيب.

يكفي إن الطيارات الإسرائيليه كانت بترمي حمولتها قبل أن تصل لهدفها خوفا من صواريخ الدفاع الجوي أن تصطادها

نيجي عند أخر نقطه

و هي الثغره:

الثغره حصلت ليه بسبب قرار سياسي من السادات والقاعده هي لابد من فصل السياسه عن الحرب.

اللي حصل الضغط زاد علي الجبهه السوريه من الإسرائيلين فقرر السادات بدفع الدبابات في هجوم علي المواقع الإسرائيليه لتخفيف الضغط علي الجبهه السوريه.

و ما حدث إن الدبابات طلعت من تحت حمايه حائط الصواريخ فإصطادتها الطيارات الإسرائيليه تم تدمير حوالي 250 دبابه مصريه ( رقم صعب فعلا ولكنه ليس هزيمه)

هنا أصبحت منطقه تعرف بالدفرسوار خاليه من الجيش بين الجيش الثاني و الثالث المصري منطقه حوالي نصف قطرها حوالي 3 كيلو.

كشفت تلك الثغره طائره تجسس أمريكيه فأبلغوا إسرائيل اللتي أسرعت إلي هناك محاوله تحقيق أي نصر و عبروا لغرب القناه محاولين الإلتفاف حول الجيش الثاني شمالا و إحتلال الإسماعيليه ولكن لم يفلحوا فإتجهوا جنوبا نحو الجيش الثالث و محاولا إحتلال مدينه السويس.

لكنه لم يفلح في أي من ذلك و لم يستطع إلا السيطره علي بعض القري المحيطه بالمحافظه و بعدها طرد منها شرد طرده.

(يعني مفيش أي إنتصار ليهم يذكر)

و كان تحضير من القياده المصريه لضربه تنهي علي الجيش الإسرائيلي في الثغره و لم يكن في سيناء وقتها إلا بعض المليشيات.

يعني ضربه تكسر الظهر فعلا و كان غالبا هيبقي بالسلاح الكيميائي أو البيولوجي و لكن السادات رفض الضربه لأنه ستأثر علي وحدات من الجيش و أيضا مدينه السويس.

دا غير بعد وقف إطلاق النار أول شئ طلبته إسرائيل هو سحب قوتها اللي في الثغره.

طب ليه؟؟؟؟؟

لأن صور الأقمار الصناعيه الامريكيه بينت إلتفاف وحدات كامله من الجيش المصري حول منطقه الثغره و معظمها وحدات مدرعه و دبابات قادره علي إفناء القوات الإسرائيليه في خلال ساعات معدوده و دي كانت الدبابات اللي حصلها عطل في المعركه و إتصلحت و رجعت للمعركه و وحدات من الجيش التاني و الثالث رجعت للخلف ، واخدين بالكوا من الجيش الثالث اللي رجع للخلف يعني مش متحاصر و لا حاجه.

الموضوع دا أنا تعبت فيه بجد إقروه بإمعان دي خلاصه قرأه كتيره جدا

نصر أكتوبر أسطوره عسكريه بكل المقاييس

و من يقول غير ذلك فعذرا له لأنه لا يفهم شئ في المعارك أو الحروب العسكريه

و شكرا

لو في أي إستفسار إسأل علي طول

محمد غلاب